Ai tii nimabong riki ao e a nako kain te rinerine ibukin te Beretitenti iaon Kiribati ni kabuta.
…
Sport news..
E maonaki ni bwakantaain te bong ae te Kanimabong 6/1/2012 n te aoa 5pm kauakin te takakaro n te tennis irouia ikawai ao u14. E nakon uangaun tabun ake a roko ni bukamarua te Christopher Tournament aio irouia taan takakaro ma raraoia ao ai te irua ma buna- te major sponsor naba nakon te kauaba aio, Bonteman ma buna.
Aio ai bon tibwa te moan kauaba are e karaoaki ni moan te ririki aio n te takakaro ae te tennis. Iai tengaun ma temanna ikawai ake a bae araia ibukin te bokakanao aio ao tengaun ma uoman u14 ake ana ira naba buakon te kauaba aio. Ioera, Torea, Ariteta, Toantabu, Tab’akea, Taie, Henry, Tateraka,Timeon, Tiriata ao Mweraoi ake a kaina te open ao Areti, Aaro, B’anian, Taara, Kourabi, Tierite, Taotioma, Frank, Atenati, Arinoko, Bureiwa, ao Bainrebu ngaia ake a kaaina te u14 nakon te kauaba aio.
E mwanennaki te takakaro aio iroun Bonteman ma buna ao n aranaki bwa te Christopher Columbus Tennis Tournament 2012. E nakon $775.00 te bota ni kaniwanga are e anga te kambwana aio nakon te Botaki n takakaro aio. N aon are e reke ma irouia taan takakaro tabeman ao a kukurei n taekinna bwa e rangi ni materaoi te kauaba aio ni kaniwanga te mwane aikai a bon rangi n raraoi. N te open ao $300, $200 ao $100 ibukin te moanna, te kauoman ao te kateniman. Ibukia u14 ao a bon rine naba kaniwangaia bwa $100, $50 ao $25 ibukin naba te moanna, te kauoman, ao te kateniman.
E reitinako bukamaruan te kaukuki aio ma te amwarake ao te mooi karewerewe n te bwakantaai ao ni motirawa nakon itiua n te moan tairiki.
E na wakinako te kabo nakon te kaonobong ae ningabong ao ni karaoaki te finals nakon naba te kaonobong ae na roko, 14/1/2012.
…
6/1/2012 Man bwanaan Kiribati
Uoman ataei ake a ribotinaki man te Botaki ni Kuakua bwa a bua maeuia ni karangainan te bong aio. N te riboti are ti karekea ma iroun te Tarekita ibukin kuakua ao kamarurungaia aoraki Dr Tioboa Timeon ao e ribotina bwa ataei aika a bua maeuia aikai a bon uarereke bwa temanna ai bon tibwa teuana ana namwakaina ao are temanna e a bon tibwa bungiaki. E taku Doctor Tioboa bwa imwin ana tutuo te Doctor are e karaoia nakoia ataei aikai n rokona n te onaoraki ao e kunea bwa a bon kaman tia n toki maeuia ngke a nikiraki irouia n te onaoraki I Nawerewere. Te ataei are e a tibwa bunggiaki e bon bua maeuna imwin tinakon te rara ae rangi ni korakora mani butoina ao are temanna e bua maeuna imwin bonon ikena imwin kammamakina iroun tinana. Man kabuanibwai aika a riki aikai ao e a kanakoa ana kauring te botaki ni kuakua bwa e riai kawarakin te onaoraki ibukin te bung nakon ae te bung I tinaniku. Tiaki ti ngaia ma e bon kauring naba nakoia tiina bwa a riai n aki wene ni kammama ke ni matu ma a riai raoi ni marurung ao n tekateka n te tai are ana kamamama iai natia. E kamatoa nab ate tarekita bwa man irakin raoi nanon kaetieti aikai ao ena bon akea te kangaanag ae e na manga riki nakoia ataei aika a uarereke.
Ao e nang toki ngkai te kangaanga ni kaeineti ma taren te bwa ke te bentin are e a tia n namakinaki inanon wiki aika a nako ngkai e a roko te kaibuke ni bwaa ma I Biti ni bwkan taain te bong are ngkoananoa. E kamatoa n taekinna te KOIL te kambwana ni bwaa ma I Kiribati bwa e aki tare ma inanon bain te KOIL te bentin ma e ti bwaunanaki ngke e a roo ana rongorongo Biti bwa ena roko te kaibuke ni bwa I Kiribati n tebwi tabun bongin te nawakaina aio. E taku KOIL bwa bwaunanakin te bentin n aron are e namakinaki n taai aika a nako bon ana anga te KOIL ni katoka te kangaanga ae na riki ngkana arona bwa e na bon tare raoi te bwa imwin rokon te kaibuke are e katautauaki ngkoa bwa ena roko n tebwi tabun bongin iai te namwakina aio. E ngae n anne ao e taekinna naba KOIL bwa kawaina ngkoa te kaibuke ni bwaa n aron rongorongona are e roko irouna ena moana moa Nauru ma imwin te reitaki are e karaoia KOIL ma Biti iaon te kangaanga are e na riki ngkana ae eiremwe n roko te kaibuke ni bwaa aei ao e a bita naba kawaina te kaibuke ni bwaa aei ni kaea moa Kiribati. Irarikin anne ao e katerea naba n taekina te KOIL bwa bon iai naba bwaunaia abamwakoron nako Kiribati te bentin are e a bon teimatoa naba n tiku inanon bain te KOIL ma te kangaanga bwa akea ana anga KOIL ni karokoi n aba aikaingkai bon akea naba te kaibuke are a turaoi ibukin uotakin ao karokoan bwa aikai n aba ake I tinanikun Tarawa.
515 botan mwaitia aomata ake a buokaki man ana tiim ni koromata Aotiteria man te mwaiti aio ao ia 100 ake a karaoaki te korokoro nakon mataia, iai 25 ake anganaki aia bwai n aoraki ao koraki aikai ake a aorakina te tioka. Aei te riboti are ti karekea man te clinic ibukin te mata i Nawerewere am e ngae n anne ao n te mwaiti naba aio ao iai ake a bon reke naba nakoia aia kirati ni mataki ibukin riki buokaia n aia taratara. E oti naba bwa te mwaiti aio ao iai tabeman ake a bon karaoaki te tutuo nakon mataia ao n anganaki bwain aoraki ake a na kona ni kateimatoa itiakin ma aia taratara raoi. E ngae n anne ao te tim ni koromata aio e a bon tia n oki rikaaki nako abana n te bong are ngkoananoa.
Ao niI kabanean am rongorongo ibuki ongoram ao reirein ngkoa te KPC ae kinaki n arana ae te CICD e nang waaki n anga n te ririkia aei rabakau ke kanoan te reirei are a tataneiai kauarinan n reirei n anga nakoia aia ataei. E taku te tia koroboki ni kabuta n ana reirei te KPC Rev Kibau Rimon bwa ai bon tibwa te ririki aei are e nang waki iai Alfred Stark Memorial College ma kannoan ana program iaon te academic ngkai e tataneiai ngkoa ni waaki bwa te vocational school. E taku Kibau bwa a kantaningaki ataei ake ana reirei n te ririki aio bwa ana reiakinaki taian subjects n aron te rabakau te taetae n Imatang, te numera, ao tabeua riki n ikotaki naba ma rabakau iaon mwakuri ni kabenta, kateitei ao tebeua riki ibukia mwane ke te waewae ma mwakuri n aine ibukia ataeinaine ake a na rangi ni manena naba nakoia ibukin taai aika a na roko.
mauri naba te administrator.
e rang raraba te kaongora n aei ao aei are i taku ba ti bon riai ni kauataoa ngaira taan takakaro te kakaitau nakon te sponsor aei ma ana utu. are e bon aki naba reke rokom n te closing ao ngke ngkai ko na noora maitin ana katauraoi n ana amarake.
bon raora naba teuare te tia koroboki n te taiwan embassy ao e rang kakaitau naba n te aeka ni boutoka aei, e reitia naba n taku ba ana aobiti e bon tauraoi naba ni boutoka te takakaro aei tao uatai n te ririki. boni ngaia naba are e biriakina are e na renovated ara court aei iroun oecc ma tao ai tiana ni karaoa te complex ao e a rairikakiia naba aei.
tao ti ngaia anne ao ti a manga ongongora ao ko a ururinga riki arau ba Ioera, ma tiaki Ioeraka.
e raba riki ao ti a kakantaningai tokan am pictures.
e raba riki te updates ao ko bon tonu n aram,
rabwa riki updates aika kakaongora. Ao e rang kananokawaki ae e mate te teei man te kammama ao bon te reirei naba nakoia tiina. E rabwa Dr n ana anga reirei. Ti kukurei naba n ongo rongorongon te tennis ao e bon riai n rang boutokaaki ngaia are tia karabwa riki Bonteman ma ana utu n aia sponsor. Kantaninga bwa iai aika ana tokaki nanoia ni kan sponsor te tennis nakon taai aika imwaira akai.
rabwa riki te siite aei.